2026-01-07 14:05:00
Shaheen Afridi: ഫെബ്രുവരിയിൽ ആരംഭിക്കാനിരിക്കുന്ന ടി20 ലോകകപ്പിന് മുന്നോടിയായി തങ്ങളുടെ സൂപ്പര് പേസര് ടീമില് തിരിച്ചെത്തുമോയെന്ന ആശങ്കയിലാണ് പാക്കിസ്ഥാന്. കാല്മുട്ടിന് പരിക്കേറ്റതിനെ തുടര്ന്ന് വിശ്രമത്തിലുള്ള ഷാഹീന് അഫ്രീദി സുഖം പ്രാപിച്ച് തിരിച്ചെത്തുമെന്ന ശുഭാപ്തി വിശ്വാസമാണ് പാക് ടീം ക്യാപ്റ്റന് സല്മാന് അലി ആഗ പങ്കുവെക്കുന്നത്.
ടീമിലെ പേസ് അറ്റാക്കറായ താരത്തിന്റെ ഫിറ്റ്നസിന് വലിയ പ്രാധാന്യമാണ് പാക് ക്രിക്കറ്റ് നല്കുന്നത്. താരത്തിന്റെ ആരോഗ്യനിലയായിരിക്കും ടൂര്ണമെന്റില് ടീമിന്റെ ഗതി നിര്ണയിക്കുന്ന പ്രധാന ഘടകം. ഇന്ത്യയിലും ശ്രീലങ്കയിലുമാണ് ലോകകപ്പ് നടക്കുന്നത്.
ലോകകപ്പിന് അദ്ദേഹം ഫിറ്റ്നസ് നേടുമെന്ന് പ്രതീക്ഷിക്കുന്നു, പക്ഷേ മെഡിക്കല് പാനലിന്റെ ഉപദേശപ്രകാരം പാകിസ്ഥാന് ക്രിക്കറ്റ് ബോര്ഡില് നിന്നാണ് അന്തിമ തീരുമാനം ഉണ്ടാകുകയെന്നും സല്മാന് ദാംബുള്ളയില് ശ്രീലങ്കക്കെതിരായ മത്സരത്തിന് മുന്നോടിയായി മാധ്യമങ്ങളോട് പറഞ്ഞു.
ഫിറ്റ്നസ് വീണ്ടെടുക്കാന് തീവ്രശ്രമം
ലാഹോറിലെ ഹൈ പെര്ഫോമന്സ് സെന്ററില് പാകിസ്ഥാന് ക്രിക്കറ്റ് ബോര്ഡിന്റെ മെഡിക്കല് പാനലാണ് ഷാഹീന്റെ ഫിറ്റ്നസ് കാര്യങ്ങളില് മേല്നോട്ടം വഹിക്കുന്നത്. ബുധനാഴ്ച പി.സി.ബി പേസര് റീഹാബിന് വിധേയനാകുന്നതിന്റെ ഒരു വീഡിയോ പുറത്തുവിട്ടിരുന്നു. എന്നാല് പരിക്കിന്റെ വ്യാപ്തി വ്യക്തമാക്കിയിട്ടില്ല, പൂര്ണ ഫിറ്റ്നസ് വീണ്ടെടുക്കാന് എത്ര സമയമെടുക്കുമെന്ന് വ്യക്തമാക്കിയിട്ടുമില്ല.
പരിക്കേറ്റത് ബിഗ് ബാഷ് ലീഗിനിടെ
ഓസ്ട്രേലിയയില് നടന്ന ബിഗ് ബാഷ് ലീഗ് മത്സരത്തിനിടെ ഫീല്ഡ് ചെയ്യുന്നതിനിടെയാണ് ഇടംകൈയ്യന് പേസര്ക്ക് കാല്മുട്ടിന് പരിക്കേറ്റത് . ഫ്രാഞ്ചൈസിയായ ബ്രിസ്ബേന് ഹീറ്റ് അദ്ദേഹത്തെ വിട്ടയക്കുകയായിരുന്നു. തുടര്ന്ന് പിസിബി മേല്നോട്ടത്തില് സുഖം പ്രാപിക്കാന് പാകിസ്ഥാനിലേക്ക് തിരികെ വിളിപ്പിക്കുകയായിരുന്നു.
ഷഹീന് കാല്മുട്ടിന് പരിക്കേല്ക്കുന്നത് ഇതാദ്യമായല്ല. 2021ല് ഗാലെയില് നടന്ന ഒരു ടെസ്റ്റ് മത്സരത്തിനിടെ ഫീല്ഡ് ചെയ്യുന്നതിനിടെ സമാനമായ പരിക്ക് പറ്റിയിരുന്നു. ഇത് അദ്ദേഹത്തെ മാസങ്ങളോളം കളിക്കളത്തില് നിന്ന് വിട്ടുനില്ക്കാന് കാരണമായി.
ശ്രീലങ്കയുമായുള്ള ടൂര്ണമെന്റ് ലോകകപ്പിനുള്ള മുന്നൊരുക്കം
ലോകകപ്പിനായി പാകിസ്ഥാന് സന്തുലിതവും ശക്തവുമായ ഒരു ടീമിനെ ഒരുക്കിയിട്ടുണ്ടെന്നും ശ്രീലങ്കന് പരമ്പര കളിക്കാരെ പ്രാദേശിക സാഹചര്യങ്ങളുമായി പൊരുത്തപ്പെടാന് സഹായിക്കുമെന്നും സല്മാന് കൂട്ടിച്ചേര്ത്തു. പാകിസ്ഥാന് അവരുടെ എല്ലാ ലോകകപ്പ് മത്സരങ്ങളും ശ്രീലങ്കയില് കളിക്കും.
ലോകകപ്പിന് മുന്നോടിയായി ശ്രീലങ്കക്കെതിരായ ഈ പരമ്പര കളിക്കാര്ക്ക് വളരെയധികം സഹായകമാകും, പ്രത്യേകിച്ച് ശ്രീലങ്കയില് അത്രയധികം ക്രിക്കറ്റ് കളിച്ചിട്ടില്ലാത്തവര്ക്ക് ഇത് കൂടുതല് ഗുണകരമാകുമെന്നും സല്മാന് പറഞ്ഞു.
സൂപ്പര് ഓള്റൗണ്ടര് തിരിച്ചെത്തുന്നു
ശ്രീലങ്കയ്ക്കെതിരായ മൂന്ന് മത്സരങ്ങളുള്ള ടി20 പരമ്പരയ്ക്കുള്ള പാകിസ്ഥാന് ടീമില് പുതുമുഖ താരമായി ഖവാജ നഫേയെ മാത്രമേ ഉള്പ്പെടുത്തിയിട്ടുള്ളൂ. തോളിലെ ശസ്ത്രക്രിയയെ തുടര്ന്ന് എട്ട് മാസത്തെ ഇടവേളയിലായിരുന്ന പരിചയസമ്പന്നനായ ഓള്റൗണ്ടര് ഷദാബ് ഖാന് ഈ പരമ്പരയിലൂടെ ദേശീയ ടീമിലേക്ക തിരിച്ചെത്തും.
ഡിസംബറില് ബിഗ് ബാഷ് ലീഗില് മികച്ച ഫോം കാഴ്ചവെച്ചതിനെ തുടര്ന്ന് ദേശീയ സെലക്ടര്മാര് ഷദാബിനെ തിരിച്ചുവിളിക്കുകയായിരുന്നു. ഇത് ടി20 ലോകകപ്പിന് മുന്നോടിയായി പാകിസ്ഥാന്റെ നിരയില് ആഴവും അനുഭവപരിചയവും വര്ദ്ധിപ്പിച്ചിട്ടുണ്ട്.
